Bukang liwayway, bagong pag-asa, bagong buhay!
Buo ang isip at buhay ang kalamnan sa lumipas na magdamag!
Di mahagilap ang pagtulog sa bigat ng dibdib at walang hanggang pag-aalala
Dinig sampu ang mga hininga, ng inang ayaw panawan ng masidhing damdaming
Masilayan ang dugo't laman na iniluwal sa liwanag ng buhay!
Ang katawang pagal ay ayaw sumuko sa bawat lumilipas na sandali
Sumisidhi ang dagundong ng dibdib na bumuhay sa anak na uliran
Di alintana ang bawat kasinungalingan ng mga bwitreng animo'y mga walang inang
Naghihintay na masilayan ang murang mukha ng minamahal na anak
Tahan na ina, at taas nuong iwaglit ang bangungot na sumasaklaw
Sa ala-ala ng mahal na anak dahil ito'y pinawi na ng di mabilang na mga kamay
Ng mga kapwang mapagpalang budhi at pusong nagmamahal sa bawat kalayaan
Ng mga anak ng bayang walang takot at tigil sa harap ng tiyak na patutungohan!
Katulad ng inang ayaw panawan ng masidhing pag-aalala sa anak niyang
Hinubog sa mapagpalang kamay at diwa ng katarunga't kalayaan ng mga
Nakararaming mga inakay na patuloy na kinukopkop laban sa mga kaaway ng bayan
Ikaw ang ama, ang humobog sa anak na nag-alay ng buhay sa bayan at kapwa.
Itindig ang mag paa, mga magulang na uliran
Pagmasdan ang bawat pagsapit ng dilim, dahil ang dilim ay pangako ng
Isang maaliwalas na bukang liwayway sa dakong silangan!
Liwanag na siyang magsisilbing gabay sa katotohanan o kasinungalingan
Bukang liwayway, bangong pag-asa, bagong buhay!
Ito ang hinahangad ng bawat taong ayaw panawan ng pagkamakabayan!
Sa lipunang dinarambong ng mga palalo sa paglapastangan ng
Karapatang pantao na siyang biyaya sa bawat nilalang
Tahan na ama't ina, at ang anak na iniluwal sa liwanag ng buhay
Ay nandito ngayon sa 'yong harapan dala ang pangakong itutuloy
Ang laban sa mga kapwang walang alintana sa mga taong gustong masilayan ang
Bukang liwayway, bagong pag-asa, bagong buhay!
This poem is dedicated to James Balao, one of the founders of the Cordillera Peoples Alliance who disappeared on 17 September 2008. May God Almighty give him strength to overcome the pains of being separated from his loved ones.
Ni Manny
Ika - 14 ng Oktobre 2008
No comments:
Post a Comment